Ադրբեջանի նախագահ Իլհամ Ալիևը հայտարարել է, որ Հայաստանն ի վիճակի չի լինի խոչընդոտելու «Զանգեզուրի միջանցքի» բացմանը:

«Մենք քննարկել ենք Զանգեզուրի միջանցքը ռուս պաշտոնյաների հետ իմ վերջին զրույցի ժամանակ։ Չեմ կարծում, թե Հայաստանն ունակ է արգելափակելու այդ միջանցքը»,-ասել է Ալիևը «Միջին միջանցքի երկայնքով. սշխարհաքաղաքականություն, անվտանգություն և տնտեսություն» խորագրով միջազգային համաժողովում, հայտնում է Interfax.az-ը։

Ալիևը կարծիք է հայտնել, որ Իրանը նույնպես չի կարող խոչընդոտել «Զանգեզուրի միջանցքի» գործարկմանը:

«Ինչ վերաբերում է Իրանին, կարծում եմ, որ նա էլ դա չի անի՝ հաշվի առնելով նրա շահագրգռվածությունը տարածաշրջանային կոմունիկացիոն նախագծերում: Քանի որ այդ նախագծերն ուղղված չեն որևէ մեկի դեմ, այլ, հակառակը, միայն ի շահ բոլոր շահագրգիռ կողմերի են»,- ասել է Ալիևը:

ՀՀ իշխանությունները մշտապես կրկնում են, որ Հայաստանը «միջանցքի տրամաբանության հարց չի քննարկել և չի քննարկում», այլ խոսք կարող է լինել միայն տրանսպորտային հաղորդակցությունների գործարկման մասին։