82 տարեկանում մահացել է ֆուտբոլի արքա, աշխարհի եռակի չեմպիոն Պելեն։ Բրազիլիայում 3-օրյա սուգ է հայտարարվել։
Պելեն ծանր հիվանդ էր, նա բուժվում էր քաղցկեղի դեմ և վերջին մեկ ամիսը հիվանդանոցում է անցկացրել։
Պելեն աչքի էր ընկնում խաղադաշտով տեղաշարժվելու մեծ արագությամբ և ճշգրիտ հարվածներով հակառակորդի դարպասին։
Հայաստանի ֆուտբոլի ֆեդերացիան ցավակցել է Ֆուտբոլի աշխարհի եռակի չեմպիոնի մահվան կապակցությամբ:
Ֆուտբոլիստի հոգեհանգստի արարողությունը տեղի կունենա հունվարի 2-ին՝ Սան Պաուլո նահանգի «Սանտոս» ֆուտբոլային ակումբի մարզադաշտում։
Պելեն 93 խաղ է անցկացրել Բրազիլիայի ազգային հավաքականում, խփել 77 գոլ։ Աշխարհի չեմպիոն է հռչակվել 1958, 1962 և 1970 թվականներին։ 1958 թվականի և 1970 թվականի աշխարհի առաջնությունների լավագույն ֆուտբոլիստը։ Մասնակցել է նաև 1966 թվականի առաջնությանը։ Լիբերտադորեսի գավաթի և միջմայրցամաքային գավաթի խաղարկությունների հաղթող (1962-1963 թվականներ) է։ 1970 թվականին հռչակվել է աշխարհի լավագույն մարզիկ, իսկ հետո Հարավային Ամերիկայի լավագույն ֆուտբոլիստ (1973 թվական)։