Արցախի արտաքին գործերի նախարար է նշանակվել Սերգեյ Ղազարյանը՝ ազատվելով Հայաստանում ԱՀ մշտական ներկայացուցչի պաշտոնից: Նախագահ Արայիկ Հարությունյանը ստորագրել է հրամանագիրը։
Դավիթ Բաբայանն ազատվել է Արցախի արտաքին գործերի նախարարի ժամանակավոր պաշտոնակատարի պաշտոնից:
Մի շարք այլ հրամանագրերով Սրբուհի Արզումանյանն ազատվել է ԱՀ Նախագահի աշխատակազմի ղեկավարի առաջին տեղակալի պաշտոնից և նշանակվել ԱՀ արդարադատության նախարար, Արամ Սարգսյանը նշանակվել է քաղաքաշինության նախարար:
Արմեն Մանգասարյանը նշանակվել է սոցիալական զարգացման և միգրացիայի նախարար: Մինչ այդ նա զբաղեցնում էր Արցախի բնակարանային հարցերի կոմիտեի նախագահի պաշտոնը։
Առողջապահության նախարարն ավելի վաղ էր նշանակվել։
Նոյեմբերի վերջին Արցախի կառավարությունում 11 նախարարություններից 9-ի ղեկավարներն ազատվեցին պաշտոններից։ Նորանշանակ պետնախարար Ռուբեն Վարդանյանը հայտարարել էր, որ կառավարման նոր որակ է հարկավոր։