ԱՄՆ նախագահ Ջոզեֆ Բայդենը Նովրուզի տոնի կապակցությամբ Ադրբեջանի նախագահ Իլհամ Ալիևին հղած ուղերձում վերահաստատել է Վաշինգտոնի աջակցությունն Բաքվի և Երևանի միջև կայուն խաղաղության հաստատմանը։
«Միացյալ Նահանգները վերահաստատում է իր աջակցությունն Ադրբեջանի և Հայաստանի միջև կայուն խաղաղությանը, որը կնպաստի Հարավային Կովկասում գալիք սերունդների անվտանգությանն ու բարգավաճմանը»,- ասվում է ուղերձում, գրում է APA-ն։
Վարչապետ Նիկոլ Փաշինյանը, անդրադառնալով Ադրբեջանի կողմից Լաչինի միջանցքի ապօրինի արգելափակման հետևանքով շարունակվող ճգնաժամին, Բաքվի աճող ագրեսիվ հռետորաբանությանը, բանակցային հուսալի միջազգային մեխանիզմների գործարկմանը վերաբերող հարցերին, ասել է, որ ուզում է հետևյալ ուղերձը հղել բոլորին և միջազգային հանրությանը. խաղաղության պայմանագիր լինելու է և լինելու է մինչ օրս բարձրագույն մակարդակներում ձեռք բերված գրավոր փաստաթղթերի հիման վրա:
Նա նշել է, որ Ալիևը մարտի 18-ին ունեցած ելույթում բացահայտ, բառացի ասել է, թե Հայաստանը պետք է ընդունի Ադրբեջանի պայմանները և համաձայնվի Բաքվի պայմաններով դելիմիտացիա իրականացնել, հակառակ դեպքում՝ ոչ մի խաղաղության պայմանագիր չի լինելու: «Ոչ մի խաղաղության պայմանագիր չի լինելու»,- սա բառացի մեջբերում է Ադրբեջանի նախագահի խոսքից:
