Այցով Բաքվում գտնվող Ֆրանսիայի ԱԳ նախարար Կատրին Կոլոնան, անդրադառնալով Ադրբեջանի նախագահ Իլհամ Ալիևի հետ հանդիպմանը, Twitter-ի իր միկրոբլոգում գրել է, որ կոչ է արել նրան բացել Լաչինի միջանցքը։
Նա նշել է, որ վստահության վերականգնումը կոնկրետ քայլեր է պահանջում։
«Երկար բովանդակալից զրույց նախագահ Ալիևի հետ։ Ֆրանսիան խրախուսում է Ադրբեջանի և Հայաստանի միջև խաղաղ բանակցությունները միջազգային իրավունքին համապատասխան, կոչ է անում ապաշրջափակել Լաչինի միջանցքը։
Վստահության վերականգնումը կոնկրետ քայլեր է պահանջում»,- ասվում է Ֆրանսիայի ԱԳ նախարարի գրառման մեջ։
Կոլոնայի ացն Ադրբեջան տարածաշրջանային է, նա կլինի նաև Հայաստանում և Վրաստանում։
Ապրիլի 23-ին Ադրբեջանը, հերթական անգամ կոպտորեն խախտելով 2020թ. եռակողմ հայտարարության դրույթները, փակել է Արցախ-Հայաստան սահմանագծին գտնվող Հակարիի կամուրջը, որը գտնվում է ՌԴ խաղաղապահ զորակազմի պատասխանատվության տիրույթում՝ Լաչինի միջանցքում։ Ադրբեջանի պետական սահմանապահ ծառայությունը հայտարարել է, որ հսկիչ անցագրային կետ է տեղակայել Լաչին-Ստեփանակերտ ճանապարհին։