Ադրբեջանի ԱԳ նախարար Ջեյհուն Բայրամովը հայտարարել է, թե Հայաստանը պետք է ընտրություն կատարի «տարածաշրջանային համագործակցության և հարևանների հանդեպ անհիմն տարածքային նկրտումների միջև»։

«Իհարկե, այդ հարցում կարևոր է նաև միջազգային հանրության դերն ու նշանակությունը»,–ասել է նա, գրում է Interfax.az-ը։

Նա ասել է, թե կարևոր է «չսատարել Հայաստանի ռևանշիստական փորձերին»։

Հոկտեմբերի 10–ին Ադրբեջանի ԱԽ քարտուղար, գեներալ–գնդապետ Ռամիլ Ուսուբովը սպառնալիքներ էր հնչեցրել Հայաստանի հասցեին՝ ասելով, որ Ադրբեջանի հետ խաղաղության պայմանագրի կնքման առումով «ամեն բաց թողած օրն էլ ավելի մեծ կորուստների է մոտեցնում Հայաստանին»։

Ուսուբովը նաև ասել է, թե որքան կարևոր է ՀՀ համար «ավարտին հասցնել սահմանազատումը»։ Ուսուբովը նաև հայտարարել է, թե Ղարաբաղի հայ բնակիչների համար «Ադրբեջանի քաղաքացիություն ստանալու և վերաինտեգրման գործընթաց սկսելու պատմական հնարավորություն է տրված»։