ԱՄՆ դեսպան Քրիստինա Քվինն ու ԱՄՆ պետքարտուղարության կրթական և մշակութային բյուրոյի քաղաքականության հարցերով փոխպետքարտուղարի տեղակալ Ռաֆիկ Մանսուրը մասնակցել են Լրագրողական գերազանցության նոր կենտրոնի բացմանը Հայաստանի ամերիկյան համալսարանում։
Միջոցառման ընթացքում Գերազանցության կենտրոնի շուրջ համագործակցության և լրագրողների մագիստրոսական ուսուցման ծրագրի ներդրման վերաբերյալ փոխըմբռնման հուշագիրը ստորագրվել է Հայաստանի ամերիկյան համալսարանի և Վաշինգտոնի նահանգային համալսարանի միջև, տեղեկացնում է ՀՀ-ում ԱՄՆ դեսպանատունը:
Մեդիա դաշտի և ժողովրդավարության զարգացմանը միտված համալսարանական փոխգործակցության այս նախաձեռնությունը ֆինանսավորելու նպատակով ՀՀ-ում ԱՄՆ դեսպանությունը կհատկացնի 1․3 միլիոն դոլար։
Նախաձեռնությունը նպատակ ունի աջակցելու Հայաստանի մեդիա ոլորտի կատարելագործմանը։