Ղազախստանի գործարարները հետաքրքրված են Հայաստանի շինարարության ոլորտում աշխատանքներ ծավալելու հնարավորությամբ։ Այդ մասին Ղազախստանից ժամանած գործարարներն ասել են ԱԺ Հայաստան-Ղազախստան բարեկամական խմբի ղեկավար, տարածաշրջանային և եվրասիական ինտեգրման հարցերի մշտական հանձնաժողովի նախագահի տեղակալ Վաղարշակ Հակոբյանի հետ հունվարի 26-ին տեղի ունեցած հանդիպմանը։
Հյուրերը Վաղարշակ Հակոբյանին են ներկայացրել իրենց կառույցի՝ մոտ երեք տասնյակ տարվա հասնող գործունեությունը՝ նշելով, որ հետևում են վերջին հինգ տարիներին Հայաստանում ընթացող շինարարությանը, հայտնում է ԱԺ մամուլի ծառայությունը։
Ղազախստանից ժամանած գործարարները նաև պատրաստակամություն են հայտնել հայ գործընկերների հետ կիսվել իրենց փորձով և գիտելիքներով:
Վաղարշակ Հակոբյանը ներկայացրել է մեր երկրում վերջին տարիներին իրականացվող մեծածավալ շինարարությունը, որն ընդգրկում է և՛ բնակարանաշինությունը, և՛ ենթակառուցվածքները, հնարավոր համարել հոլդինգի հետ համագործակցությունը:
Քննարկվել են հետագա համագործակցությանը վերաբերող հարցեր: