Իրանի պաշտպանության նախարար Մոհամադ Ռեզա Աշտիանին մարտի 13–ին կառավարության նիստում հայտարարել է, որ Թեհրանը Երևանի հետ քննարկել է պաշտպանական փոխգործակցությունը զարգացնելու հարցեր։

«Պաշտպանության ոլորտում փոխգործակցությունը զարգացնելու նպատակով մենք հանդիպումներ ենք անցկացրել տարբեր երկրների հետ», - ասել է նա՝ շեշտելով նաև Հայաստանի անունը, հայտնում է «Ազատությունը»։

Աշտիանին ասել է, որ Թեհրանը հասել է ինքնաբավության անօդաչու թռչող սարքերի շարժիչների արտադրության ոլորտում՝ ընդգծելով, որ պաշտպանական արտադրանքի արտահանման ծավալները վերջին երկու տարվա համեմատ աճել է 4-5 անգամ։

«Հաշվի առնելով տարածաշրջանային պայմաններն ու ներկա իրավիճակը՝ առաջիկա տարիներին այդ ծավալները կավելանան՝ կախված արտադրվող զենքերից ու ներկայացվող նորամուծություններից», - հայտարարել է Իրանի պաշտպանության նախարարը՝ նշելով, որ հիմա Թեհրանն աշխատում է ծանր շարժիչների արտադրության վրա։

Ավելի վաղ Իրան էր այցելել ՀՀ ՊՆ ղեկավար Սուրեն Պապիկյանը, որի այցից հայկական կողմը մանրամասներ չի հաղորդել։ Նշվել է, որ Պապիկյանը հանդիպել է Իրանի նախագահ Էբրահիմ Ռայիսիի, Իրանի զինված ուժերի շտաբի պետ, գեներալ-մայոր Մոհամմադ Բաղերիի, Իրանի ռազմական գերատեսչության ղեկավարի հետ, քննարկել ռազմական համագործակցությանն ու տարածաշրջանային անվտանգությանն առնչվող հարցեր։