Մեծ Բրիտանիայի վարչապետ Ռիշի Սունակը հույս է հայտնել, որ մինչև նոյեմբեր Հայաստանը և Ադրբեջանը խաղաղության պայմանագիր կստորագրեն։ Այդ մասին ասվում է ՝ Բաքվի XI գլոբալ ֆորումի մասնակիցներին ուղղված Սունակի նամակում։
Նամակն ընթերցել է Ադրբեջանում Մեծ Բրիտանիայի դեսպանը, հայտնում է Minval.az-ը։
Նա նշել է, որ այժմ Ադրբեջանի և Հայաստանի միջև հակամարտությանը վերջ դնելու պատմական հնարավորություն է ստեղծվել։
«Ներկայումս Հայաստանի հետ երկարամյա հակամարտությանը վերջ դնելու պատմական հնարավորություն կա։ Հուսով ենք, որ դա տեղի կունենա մինչև ընթացիկ տարվա նոյեմբեր, երբ անցկացվելու է COP 29-ը (ՄԱԿ-ի Կլիմայի փոփոխության կոնֆերանս) կոնֆերանսը»,- ասվում է Սունակի ուղերձում։
Ավելի վաղ, որպես բարի կամքի քայլ Հայաստանն իր համաձայնությունն էր հայտնել «COP29»-ը հյուրընկալելու նպատակով Ադրբեջանի ներկայացրած հայտին և հանել իր թեկնածությունը, իսկ Ադրբեջանն իր աջակցությունն էր հայտնել Արևելյան Եվրոպայի խմբի «COP»-ի բյուրոյին անդամակցելու համար առաջադրված Հայաստանի թեկնածությանը:
