Դատարանը մերժել է ՀՀԿ փոխնախագահ Արմեն Աշոտյանի գույքի վրա արգելանք դնելու միջնորդությունը։
«Գտնում եմ հայցը չի բավարարում դատավարության պահանջները։ Գույքային հայց հարուցվում է մեղադրյալի կամ այն անձի դեմ, որոնց վրա կարող են գույքային պատասխանատվություն դնել մեղադրյալի գործունեության համար»,-ասել է դատավոր Վահե Դոլմազյանը։
Նա նշել է, որ հայցադիմումում նշված է մեղադրյալներից յուրաքանչյուրի դեմ պահանջ, գրում է Aysor.am-ը։
«Բայց եթե 4 մեղադրյալներից պահանջ է ներկայացվում 905 մլն գույքային վնաս, պետք է, օրինակ, նաև պատճառաբանվեր, թե ինչու մեկ մեղադրյալից պետք է գույքային պատասխանատվություն ստանալ։ Նման պատճառաբանություններ ներկայացված չեն հանրային մեղադրողների կողմից, ուստի հայցադիմումը վերադարձվում է ձեզ»,-ասել է դատավորը։
Աշոտյանը «Երևանի Մխիթար Հերացու անվան պետական բժշկական համալսարան» հիմնադրամում կատարված առերևույթ չարաշահումների գործով մեղադրվում է պաշտոնեական դիրքի չարաշահման և փողերի լվացման հոդվածներով, որն առաջացրել է ծանր հետևանքներ։