Եվրախորհրդարանում առաջարկել են հեռացնել Հունգարիային Շենգենի գոտուց՝ ՌԴ և Բելառուսի քաղաքացիների համար վիզային ռեժիմի մեղմացման պատճառով։ Պատգամավորներն այդ պահանջով նամակ են հղել Եվրահանձնաժողովին, գրում է Politico-ն։
Բրյուսելում կարծում են, որ դա կարող է սպառնալիք լինել Եվրոպայի անվտանգության համար։
«Եթե Հունգարիայի կառավարությունը հրաժարվում է փոխել իր քաղաքականությունը, ապա ԵՀ-ն և ԵՄ բոլոր անդամները «պետք է կասկածի տակ դնեն Հունգարիայի ներկայությունը Շենգենյան գոտում»՝ Եվրոպայի քաղաքացիների պաշտպանության նոր միջոցներ սահմանելով Հունգարիայի սահմաններին»,–ասվում է նամակում, գրում է ՌԲԿ–ն։
Առաջարկվող միջոցների թվում է նաև Հունգարիայի այցագրերի ճանաչման չեղարկումը ԵՄ մյուս երկրների կողմից։
Նամակը մոտ 70 պատգամավոր է ստորագրել։
Ավելի վաղ մի քանի եվրոպական լրատվամիջոցներ հաղորդել էին, որ Հունգարիան որոշել է մեղմացնել մուտքի արտոնագրերեի պահանջը մի քանի երկրի, այդ թվում Ռուսաստանի և Բելառուսի քաղաքացիների համար։ Ավելի վաղ ԵՀ-ում արդեն պարզաբանում էին պահանջել Հունգարիայից այդ քայլի վերաբերյալ։
Բուդապեշտն այժմ նախագահում է Եվրոպայի խորհրդում։