Փոխվարչապետ Մհեր Գրիգորյանը հանդիպում է ունեցել Հայաստանում Բելգիայի Թագավորության արտակարգ և լիազոր դեսպան Էրիկ դե Մույնքի հետ, որին ներկա էր նաև Բելգիայի ռազմական կցորդ, գնդապետ Մարկ Լեֆեբվրը։
Գրիգորյանը և Բելգիայի դեսպանը կարևորել են ՀՀ և Ադրբեջանի միջև սահմանազատման գործընթացը։ Ընդգծվել է դրա առաջնահերթությունը՝ տարածաշրջանային անվտանգության և խաղաղության ապահովման նպատակով։
Կողմերը կարևորել են «Խաղաղության խաչմերուկ» նախագծի իրականացումը՝ այն դիտարկելով որպես տարածաշրջանում երկարատև խաղաղության և կայունության հաստատման կարևոր գործիք։
Հանդիպման ընթացքում անդրադարձ է կատարվել Հայաստանի և Բելգիայի միջև երկկողմ ու բազմակողմ համագործակցության զարգացման հեռանկարներին։
Հունվարի 16-ին ՀՀ ԱԳՆ-ն հայտարարեց, որ Հայաստանի և Ադրբեջանի միջև համաձայնություն է ձեռք բերվել սահմանազատման նոր հատվածի շուրջ։ Համաձայնությունը նախատեսում է աշխատանքների մեկնարկ հյուսիսային հատվածից՝ Հայաստանի, Ադրբեջանի և Վրաստանի սահմանների հատման կետից և շարունակություն հարավային ուղղությամբ՝ մինչև Հայաստանի ու Ադրբեջանի սահմանը Իրանի հետ։
