Սփյուռքի թեմերը շարունակում են իրենց աջակցությունը հայտնել Ամենայն Հայոց կաթողիկոս Գարեգին Բ–ին։ Այս անգամ միացյալ հայտարարությամբ հանդես են եկել Հարավային Ամերիկայի թեմերը, հայտնում է «Փաստինֆոն»։
«Հարավային Ամերիկայի Հայոց թեմերի առաջնորդները, ամբողջ հոգևոր դասը, Ազգային Եկեղեցական Կենտրոնական վարչությունը, թեմական խորհուրդների անդամները և հավատացյալ ժողովուրդն անվերապահ զորակցություն է հայտնում Ամենայն Հայոց կաթողիկոս Գարեգին Բ Վեհափառ Հայրապետին:
«Երկար կեանք տուր Հայրապետին,
Երկար օրեր Հայոց Հօր.
Տէր, անսասան պահիր դու միշտ
Քո իսկ հիմնած Մայր Աթոռ»,–ասվում է հայտարարության մեջ։
Հունիսի լույս 11–ի գիշերը հարյուրավոր մարդիկ հավաքվել էին «Զվարթնոց» օդանավակայանում իրենց աջակցությունը հայտնելու Ամենայն հայոց կաթողիկոսին, որը վերադառնում էր Արաբական Միացյալ Էմիրություններից։
«Հավատում ենք, որ Աստծո ողորմությամբ և օգնությամբ, ձեզ հետ միասին խոհեմորեն, առանց ավելորդ հուզականության, ընդվզումների, պիտի կարողանանք հաղթահարել այս դժվարությունը»,–ասել է կաթողիկոսը՝ դիմելով հավաքվածներին։
