Օլիմպիական չեմպիոն, բազմակի մեդալակիր և տիտղոսակիր հայ ըմբիշ Արթուր Ալեքսանյանը ժամանակավորապես դադարեցնում է մրցելույթները, հայտնում է armsport.am-ը։
Հայ մարզիկը (97 կգ) չի մասնակցի առաջիկա մրցաշարերին, ներառյալ մոտեցող Եվրոպայի առաջնությունը։ Այդ մասին Առաջին ալիքի եթերում տեղեկացրել է հունահռոմեական ոճի ըմբշամարտի Հայաստանի ազգային հավաքականի գլխավոր մարզիչ Արմեն Բաբալարյանը։
Մարզչի խոսքով՝ Ալեքսանյանը ներկայում անցնում է բուժման փուլ, իսկ նրա փոխարեն 97 կգ քաշային կարգում Հայաստանը ներկայացնելու է աշխարհի Մ-23 չեմպիոն Հայկ Խլոյանը։
Ըմբշամարտի ֆեդերացիան իր հերթին հայտարարել է, որ Ալեքսանյանը, այս պահի դրությամբ, բաց է թողնելու միայն Եվրոպայի առաջնությունը:
«Պաշտոնապես հայտնում ենք, որ Արթուր Ալեքսանյանը, այս պահի դրությամբ, բաց է թողնելու միայն Եվրոպայի առաջնությունը, քանի որ ապաքինվում է վնասվածքից: Արթուրը գորգում իր վերջնական խոսքը դեռ չի ասել»,-ասվում է հաղորդագրության մեջ:
