Հայ մարզիկները 9 մեդալ են նվաճել Հունաստանի Տրիկալա քաղաքում անցկացված Կիոկուշին կարատեի Եվրոպայի առաջնությունում։

Հայաստանի հավաքականը մրցաշարին մասնակցել է 13 մարզիկով և նվաճել 4 ոսկե, 1 արծաթե ու 4 բրոնզե մեդալ։

Ոսկե մեդալակիրներ են դարձել Էլեն Եփրեմյանը, Էրիկ Կոստանդյանը, Ալեն Եգորյանը և Մհեր Թեմիրյանը։ Վիկտորյա Հայրապետյանը զբաղեցրել է երկրորդ հորիզոնականը, իսկ Վահագն Հակոբյանը, Արթուր Զաքարյանը, Դավիթ Մարաբյանը և Վոլոդյա Մկրտչյանը արժանացել են բրոնզե մեդալների, հայտնում է ֆեդերացիան:

Հայ մարզիկները մրցավայր են մեկնել Հայաստանի Կիոկուշին կարատեի ֆեդերացիայի նախագահ, շիհան Անդրանիկ Հակոբյանի գլխավորությամբ։ Մարզիկներին ուղեկցել են նաև մարզիչներ Գևորգ Մանուկյանը և Սարգիս Հակոբյանը։

Հայաստանի առաջնության հաղթողներին ֆեդերացիան ֆինանսական աջակցություն է ցուցաբերել Եվրոպայի առաջնությանը մասնակցելու նպատակով։ Եվրոպայի առաջնությանը մասնակցել է մոտ 450 մարզիկ՝ 23 երկրից։