Այսօր ԼՂՀ Ասկերանի շրջանում սկսել է գործել ամառային ռազմամարզական ճամբարը: Ինչպես հաղորդում է PanARMENIAN.Net-ի թղթակիցը Ասկերանից, ճամբարի բացմանը ներկա են եղել ԼՂՀ պաշտպանության նախարար Մովսես Հակոբյանը, կրթության նախարար Վլադիկ Խաչատրյանը, ԼՂՀ ԱԺ պատգամավորներ, բազմաթիվ հյուրեր: Ճամբարում, որը կգործի 10 օր, դեռահասներ են հավաքվել ԼՂՀ Մարտունու, Հադրութի եւ Քաշաթաղի շրջաններից: «Մեր նպատակն է դաստիարակել երիտասարդությանը հայրենասիրական ոգով: Դուք պետք է պատրաստ լինեք պաշտպանել այն հողը, որի համար արյուն են հեղել ձեր հայրերն ու եղբայրները: Դուք պետք է պատրաստ լինեք ետ մղելու թշնամու ցանկացած ագրեսիա»,-ասել է ԼՂՀ կրթության նախարարը` դիմելով Արցախի երիտասարդությանը: