Լեռնային Ղարաբաղի հակամարտության կարգավորման գծով ԵԱՀԿ Մինսկի խումբը չի կարող ճնշում գործադրել Հայաստանի կամ Ադրբեջանի վրա: Այդ մասին հայտնել է ԱՄՆ-ից ԵԱՀԿ ՄԽ համանախագահ Մեթյու Բրայզան Ծաղկաձորում կայացած «Եվրոֆորումում»: «Մենք ընդամենը միջնորդներ ենք եւ կարգավորման զանազան տարբերակներ ենք առաջարկում, իսկ որոշումն ընդունում են հակամարտող կողմերը: Միջնորդները խաղաղություն են ցանկանում, որը չի կարող ձեռք բերվել առանց այս կամ այն կողմի զիջումների: Ներկայումս անհրաժեշտ է հավասարակշռություն գտնել երկու հիմնարար սկզբունքների` տարածքային ամբողջականության եւ ազգերի ինքնորոշման իրավունքի միջեւ: Իհարկե, Լեռնային Ղարաբաղը պետք է իր կարգավիճակն ունենա, որը կորոշվի հանրաքվեի ճանապարհով. դա մտնում է Մադրիդյան սկզբունքների մեջ»,- ասել է ամերիկյան դիվանագետը:

Նա նաեւ ընդգծել է, որ սկզբնական փուլում Ադրբեջանին պետք է վերադարձվեն մի քանի շրջաններ, որոնք կազմում են ԼՂՀ շուրջ անվտանգության գոտին, իսկ հետո` մի հինգ տարի անց` մնացածը: «Մենք պնդում ենք նաեւ ծանր սպառազինությունը դուրս բերելու հարցում` ռազմական գործողությունների վերսկսումից խուսափելու համար: Մադրիդյան սկզբունքների շուրջ բանակցությունները մի քանի ամիս կտեւեն, եւ միայն հետո կարելի է խոսել հաշտության պայմանագիր կազմելու մասին»,- ընդգծել է Բրայզան:

Ամերիկյան դիվանագետի ներկայիս տարածաշրջանային այցը վերջինն է` որպես ԵԱՀԿ ՄԽ համանախագահ: ԶԼՄ տվյալների համաձայն Մեթյու Բրայզան կարող է գլխավորել Ադրբեջանում ԱՄՆ դեսպանատունը: