ԵՐԵՎԱՆՈՒՄ ԻՐ ԱՇԽԱՏԱՆՔՆ Է ՍԿՍԵԼ ՏԱՐԱԾԱՇՐՋԱՆԱՅԻՆ ԱՆՎՏԱՆԳՈՒԹՅԱՆ ՀԱՐՑԵՐԻՆ ՆՎԻՐՎԱԾ ԿՈՆՖԵՐԱՆՍԸ
Այսօր Երեւանում իր աշխատանքն է սկսել «Հարավային Կովկասում խաղաղության, կայունության եւ վստահության մթնոլորտի ձեւավորումը. անվտանգության միջազգային եւ տարածաշրջանային կազմակերպությունների դերը» թեմայով կոնֆերանսը: «Արմինֆո» գործակալության հաղորդագրության համաձայն, կոնֆերանսի կազմակերպիչներն են` Երեւանի Քաղաքացիական հասարակության եւ տարածաշրջանային զարգացման ինստիտւտը ՆԱՏՕ-ի Տեղեկատվության եւ մամուլի վարչության ֆինանսական աջակցությամբ, Էբերտի անվան հիմնադրամը եւ Բաց հասարակության ինստիտուտի հայկական մասնաճյուղը: Կոնֆերանսի մասնակիցները քննարկել են Հարավային Կովկասում տարածաշրջանային անվտանգության համակարգի ձեւավորման,Կովկասում անջատողականության եւ ահաբեկչության հետ կապված հարցեր, ինչպես նաեւ անվտանգության նոր մթնոլորտի ձեւավորմանն ու «երրորդ կողմերի» դերակատարմանը վերաբերող խնդիրներ: Կոնֆերանսի աշխատանքներին մասնակցում են` Մեծ Բրիտանիայի Ազգային անվտանգության խորհրդի նախագահ գեներալ Հարրի Ջոնսոնը, ՀՀ-ում Իտալիայի, Մեծ Բրիտանիայի եւ Իրանի Արտակարգ եւ Լիազոր դեսպաններ Պաոլո Անդռեա Տրաբալցան, Տիմոտի Ջոնսը եւ Մոհամմադ Ֆարհադ Քոլեյնին, ինչպես նաեւ մի շարք ոչ կառավարական կազմակերպությունների ներկայացուցիչներ:
Լրատվության արտատպելու, կամ օգտագործելու դեպքում հղումը "PanARMENIAN.Net"-ի վրա պարտադիր է:
Լրատվության արտատպելու, կամ օգտագործելու դեպքում հղումը "PanARMENIAN.Net"-ի վրա պարտադիր է:
