Այնպիսի միջոցառումների անցկացումը, ինչպիսին Ռուսաց լեզվի օրն է, ամրապնդում են հայ-ռուսական հարաբերությունները եւ նպաստում են երկու երկրների միջեւ հումանիտար կապերի զարգացմանը: Այդ մասին Երեւանում լրագրողներին է հայտնել ՌԴ ԱՊՀ-ի, արտերկրում բնակվող հայրենակիցների եւ միջազգային հումանիտար համագործակցության գծով (Ռուսհամագործակցություն) դաշնային գործակալության ղեկավար Ֆարիդ Մուհամեդշինը: Նրա խոսքերով, առաջիկայում Հայաստանում կարող է ռուսական դպրոց բացվել: Ընդ որում Մուհամեդշինը նշել է, որ դեռեւս դա բարդ հարց է, քանի որ Հայաստանի «Լեզվի մասին» օրենքը թույլ չի տալիս իրականացնել այդ նախագիծը: «Դպրոցը հնարավորություն չի ունենա աշխատել ըստ ՌԴ չափանիշների»,-ասել է Մուհամեդշինը` հավելելով, որ հարցը հնարավոր կլինի լուծել միայն ՀՀ կրթության նախարարության մեթոդիստների հետ համատեղ աշխատանքի արդյունքում: