Հոկտեմբերի 16-ին` Կարեն Դեմիրճյանի անվ. մարզահամերգային համալիրի համերգային դահլիճում համերգով հանդես կգա բրիտանական ռոքի լեգենդ Uriah Heep խումբը: Համերգը նվիրված է «Շանթ» հեռուստաընկերության 15-րդ հոբելյանին:

Ինչպես հաղորդում է համերգի գլխավոր կազմակերպիչ` «Վիբրոգրաֆուս» ընկերությունը, երեւանյան համերգն ընդգրկվել է Uriah Heep-ի 40-րդ հոբելյանին նվիրված 2009թ.-ի համերգային շրջագայության մեջ:

Համերգից ստացած հասույթը կուղղվի աղետի գոտու բնակֆոնդի վերականգնմանը:

Uriah Heep բրիտանական խումբը ստեղծվել է 1969թ. Լոնդոնում: Երաժիշտները համաշխարհային ճանաչում ստացան 1971-1973թթ. «Look at Yourself», «Demons and Wizards» եւ «The Magician's Birthday» ալբոմների թողարկումից հետո: