8 հոկտեմբերի 2009 - 15:00 AMT
Թուրքիայի կողմից Հայոց ցեղասպանության ճանաչումը կնպաստի հայ-թուրքական մերձեցմանը
Հայոց ցեղասպանության միջազգային ճանաչման գործում սխալ է ողջ պատասխանատվությունը միայն Սփյուռքի վրա դնել: Հայաստանն ու Սփյուռքը պետք է աշխատեն միասին: Այդ մասին հայտարարել է ՀՅԴ Հայ Դատի կենտրոնական գրասենյակի քաղաքական հարցերով ղեկավար Կիրո Մանոյանը:

«Հայաստանը պետք է պահանջի Անկարայից չեղյալ հայտարարել այն բոլոր օրենքները, որոնք պատիժ են սահմանում Թուրքիայում Հայոց ցեղասպանության քննարկման համար: Բացի այդ, Երեւանը պետք է հայտարարի, որ Հայոց ցեղասպանության միջազգային ճանաչման հարցը գերակա է մնում իր արտաքին քաղաքակնության համար»,-ասել է Կիրո Մանոյանը: Բացի այդ, ըստ Մանոյանի, Հայաստանը պետք է ընդգծի, որ Թուրքիայի կողմից Հայոց ցեղասպանության ճանաչումը կնպաստի հայ-թուրքական մերձեցմանը:

«Հայոց ցեղասպանության միջազգային ճանաչման գործընթացում պետք է որոշ ռազմավարական փոփոխություններ կատարվեն եւ շեշտը դրվի Թուրքիայի կողմից այդ փաստի ճանաչման վրա»,-հայտարարել է Մանոյանը: