Հայ-թուրքական սահմանի բացումը կխթանի գյուղատնտեսական որոշ ապրանքների արտահանման աճը: Այդ մասին դեկտեմբերի 22-ին Երեւանում լրագրողներին հայտնեց Հայաստանի գյուղատնտեսության նախարար Գերասիմ Ալավերդյանը` ամփոփելով ընթացիկ տարվա արդյունքները: Նրա խոսքերի համաձայն, այդ ուղղությամբ քննարկումները տարբեր մակարդակներով են տարվում` մասնագետների, նախարարների, վարչապետի եւ նախագահի, ու արդեն ընդունվել են խելամիտ որոշումներ: Նա նաեւ նշեց, որ ուսումնասիրվում է թուրքական շուկան, ինչը հնարավորություն կտա ապահովելու հայկական արտադրանքի իրացումը: «Մենք տեղեկություններ ունենք այն մասին, որ թուրքական շուկայում գյուղատնտեսական առանձին ապրանքների արժեքը բարձր է, այդ պատճառով մենք կարող ենք մրցակցել, մասնավորապես, արտահանել մեր խաղողը», - ասաց նա:

Այդ կապակցությամբ Գերասիմ Ալավերդյանն ավելացրեց, որ սահմանի բացումը հնարավորություն կտա նշանակալիորեն կրճատելու տրանսպորտային ծախսերը, ինչն էլ կապահովի թուրքական շուկայում հայկական արտադրանքի ցածր ինքնարժեքը եւ մրցունակությունը: