Հայ-թուրքական հարաբերությունների կարգավորման մասին արձանագրությունների վերաբերյալ Հայաստանի Սահմանադրական դատարանի որոշումը Թուրքիայի հասարակության եւ թուրք քաղաքական գործիչների համար անսպասելի չէր: Այս մասին PanARMENIAN.Net -ի թղթակցին հայտնել է Սաբանչի համալսարանի փորձագետ, TESEV կենտրոնի արտաքին քաղաքականության ծրագրերի ղեկավարի օգնական Այբարս Գորջուլուն:

«Այդ պատճառով ես չեմ համարում, որ ՀՀ ՍԴ որոշումը կարագացնի Թուրքիայում արձանագրությունների վավերացման գործընթացը: Քրդամետ կուսակցության լուծարումից հետո թուրքական կառավարության օրակարգում ներկայում գերակայող են ներքին նոր հիմնախնդիրները», - ընդգծել է թուրք փորձագետը:

Այբարս Գորջուլուի խոսքերի համաձայն, ստեղծված իրավիճակից ելնելով, արձանագրությունների վավերացումը ներկայում Անկարայի համար առաջնային չէ: «Իմ կարծիքով, վավերացման գործընթացը կարագացվի ապրիլի 24-ի նախաշեմին (Հայոց ցեղասպանության զոհերի հիշատակի օրը): Դա արձանագրությունների վավերացման ոչ պաշտոնական վերջնաժամկետն է», - հայտարարել է փորձագետը:

Հայ-թուրքական հարաբերությունների կարգավորման արձանագրությունները ստորագրել են 2009 թ. հոկտեմբերի 10-ին, Ցյուրիխում Հայաստանի ԱԳ նախարար Էդվարդ Նալբանդյանն ու Թուրքիայի ԱԳ նախարար Ահմեդ Դավութօղլուն` ներկայությամբ Ֆրանսիայի, ԱՄՆ-ի, Ռուսաստանի եւ Շվեյցարիայի ԱԳ նախարարների: Շվեյցարիան 2007 թ.-ից հայ-թուրքական բանակցություններում միջնորդ է դարձել:

2010 թ. հունվարի 12-ին Հայաստանի Սահմանադրական դատարանը արձանագրությունները ճանաչեց ՀՀ Սահմանադրությանը համապատասխան: