Հետխորհրդային տարածքում, հարեւան եւ նախկին սոցիալիստական դաշինքի, ինչպես նաեւ Արեւելյան Եվրոպայի երկրների, եւ Եվրոպա ձգտող երկրների թվում բանկային համակարգի լավագույն ցուցանիշները գրանցվել են Հայաստանում: Այդ մաիսն Դիլիջանում լրագրողներին է հայտարարել ՀՀ Կենտրոնական բանկի նախագահ Արթուր Ջավադյանը: «Այդ մասին են վկայում նաեւ մեր միջազգային գործընկերների վերջին զեկույցներն այն մասին, որ մեր ֆինանսական համակարգը, մասնավորապես, բանկային հատվածը, կայուն է, առավել թափանցիկ է եւ ներուժ ունի` դիմակայելու համար ճգնաժամի նոր մարտահրավերներին, որոնք դեռ ակնկալվում են»,-ասել է նա:
Այս առնչությամբ Ա.Ջավադյանը ասել է նաեւ, որ ըստ մասնագետների կանխատեսումների, Հայաստանը ֆինանսատնտեսական ճգնաժամի հաղթահարման վերջին փուլում է գտնվում: «Հուսով ենք, որ բոլոր այդ կանխատեսումները բավական հուսադրող են եւ մենք խնդիրներ չենք ունենա ֆինանսական համակարգում»,-ասել է Ա.Ջավադյանը:
Հայաստանի բանկային համակարգի միացյալ ակտիվները 2009թ. արդյունքներով որոշակի աճ են գրանցել` 25 տոկոսով, վարկավորման ծավալները ավելացել են 14 տոկոսով, իսկ Հայաստանի ֆինանսական միջնորդության ցուցանիշը գերազանցել է 40 տոկոսը ՀՆԱ-ի ընդհանուր ծավալում: