Մարտի 16-ին Մոսկվայում կայացավ Հայաստանի, Ռուսաստանի, Սլովակիայի, Մակեդոնիայի, Իռլանդիայի եւ Անդորրայի հավաքականների ներկայացուցիչների խորհրդակցությունը: Այս հավաքականները ելույթ են ունենալու Եվրո-2012 նախընտրական մրցաշարի «B» խմբում: Խորհրդակցության նպատակն էր` համաձայնեցնել խաղերի անցկացման կանոնակարգն ու ժամանակացույցը, հաղորդում է Ռուսաստանի Ֆուտբոլի ֆեդերացիայի պաշտոնական կայքը:

Բանակցությունների արդյունքում մասնակիցները հանդիպումների կազմակերպման վերաբերյալ արձանագրություն ստորագրեցին: Սակայն ժամանակացույցի կառուցվածքի հարցում ազգային ընտրանիների ներկայացուցիչներին չհաջողվեց միահամուռ որոշման հանգել:

Այդպիսով, «B» խմբում հանդիպումների ժամանակացույցի վերաբերյալ որոշումը 2010 թվականի մարտին կոնգրեսի նախօրեին վիճակահանությամբ կընդունի UEFA-ն:

Մոսկվայում Հայաստանի հավաքականը ներկայացրեցին ՀՖՖ փոխնախագահ Աշոտ Մանուկյանն ու հավաքական թիմերի բաժնի պետ Էդգար Մանուկյանը: