Թուրքիայի իրավապահ մարմինների պնդմամբ, «Ակոս» թերթի գլխավոր խմբագիր Հրանտ Դինքի սպանությունը Թուրքիայի ռազմածովային ուժերի սպայական կազմաի կազմակերպած դավադրության մի մասն էր

Ինչպես գրում է թուրքական թերթը, մարտի 19-ին Ստամբուլի 12-րդ քրեական դատարանում սկսվել է Թուրքիայի ՌԾՈւ երեք ծովակալների եւ 30 սպաների դեմ հարուցված գործի քննությունը: Դատավարության ընթացքում մեղադրող կողմը մի շարք նյութական ապացույցներ է ներկայացրել: Այդ թվում նաեւ դավադության ծրագիր պարունակող մի խտասկավառակ, որը բացահայտվեց 2009թ. գարնանը թուրքական բանակի պաշտոնաթող սպա Լեվենթ Բեքթաշի տանը: Ըստ դատախազության, «Վանդակ» (Cage Operation) գործողությունների ծրագրի հիմնական նպատակն էր նախադրյալներ ստեղծել ռազմական հեղաշրջման համար:

Դատախազությունը պնդում է, որ գաղտնի ծրագրի առաջին փուլում կազմվել է ամենահայտնի գործիչների ցուցակը, որոնք ներկայացնում են Թուրքիայի կրոնական փոքրամասնությունները: Երկրորդ փուլում ցուցակում ընդգրկված անձանց պետք է ուղարկվեին սպառնալից նամակներ:

Իրավապահ մարմիններին հաջողվեց հայտնաբերել, առնվազն, մեկ ապացույց: 2007թ. Ստամբուլի փոստային բաժանմունքից քաղաքում գործող մի շարք հայկակն դպրոցների տնօրեններին երկթերթանոց նամակ էին հղել սպառնալիքներով: «2007թ. մայիսի 3-ին ուղարկված այդ նամակները վերնագրված էին` «Վերջին նախազգուշացում»:

Հաջորդ փուլում, բանակի հետ սերտ կապեր ունեցող լրագրողներին պետք է հանձնարարվեր լայնորեն լուսաբանել մամուլում սպառնալիքների թեման` պնդելով, թե Էրդողանի կառավարությունն ի վիճակի չէ ապահովել այդ քաղաքացիների խմբերի անվտանգությունը: Ավարտական փուլում նախատեսվում էին մի շարք սպանություններ, որոնց մեղքը պետք է բարդվեր Արդարության եւ զարգացման կուսակցության վրա:

Իրավապահ մարմինները պնդում են, թե Ստամբուլի «Ակոս» թերթի գլխավոր խմբագիր Հրանտ Դինքի, կաթոլիկ քահանա Անդրեա Սանտորոյի եւ Մալաթիայում երեք քրիստոնյաների սպանությունները այդ ծրագրի մի մասն էին կազմում:

«Վանդակի» հեղինակները կարծում էին, որ դա քաոս կառաջացնի, սակայն նրանց սպասելիքները չարդարացան»,-գրում է Today's Zaman-ը: