Հայաստանի վարչապետ Տիգրան Սարգսյանը Լոռու մարզի Ալավերդի ու Սանահին համայնքներ կատարած աշխատանքային այցի շրջանակներում այցելել է Ալավերդու "Արմենիան Քափըր Փրոգրամ" ՓԲԸ-ում: Մասնավոր այս ձեռնարկության հիմնական գործունեությունը պղնձի խտանյութի վերամշակման արդյունքում անզուտ պղնձի արտադրությունն է: Գործարանում վարչապետն աշխատանքային քննարկում է անցկացրել տնտեսության տարբեր ճյուղերում գործունեություն ծավալող գործարարների հետ: Քննարկվել են կառավարության միջոցառումները, իրականացվող բարեփոխումները, ներդրումային միջավայրի բարելավման խնդիրները: Այնուհետև Տիգրան Սարգսյանը կառավարության անդամների ու "Արմենիան Քափըր Փրոգրամի" ղեկավարների հետ շրջել է գործարանում, ծանոթացել արտադրական հնարավորություններին, հաղորդում է կառավարության տեղեկատվության և հասարակայնության հետ կապերի վարչությունը:
