Մայիսի 6-ին Լեյդենի համալսարանի գրադարանում բացվեց «Հայերը. Հնագույն քրիստոնեությունը երիտասարդ երկրում» ցուցահանդեսը` նվիրված 1660թ.-ին Ամստերդամում հայ գրքի տպագրության 350 ամյակին: Բացման արարողությանը ներկա էին բազմաթիվ համալսարանականներ, ուսանողներ, Նիդերլանդների հայկական համայնքի ներկայացուցիչներ:
Ցուցահանդեսը կազմակերպվել է Լեյդենի համալսարանի պրոֆեսոր, հայագետ Յ.Վայտենբերգի և Արևելյան ցուցանմուշների համակարգող Արնոլդ Ֆրոլայկի կողմից, հաղորդում է ՀՀ ԱԳՆ մամլո ծառայությունը:
Ցուցահանդեսի պաշտոնական բացումը կատարեց Հաագայում Հայաստանի հյուպատոս Արշակ Մանուկյանը: Նա իր ելույթում ընդգծեց, որ 5-րդ դարում հայկական գրերի գյուտը դարձավ մշակութային այն հզոր ազդակը, որի շնորհիվ հայ պատմագրությունը, թագմանչական արվեստը, պոեզիան, միջնադարյան փիլիսոփայությունը և, 16-րդ դարից սկսած, հայ տպագիր գիրքը դարձան ոչ միայն հայ ժողովրդի, այլև համաշխարհային մշակույթի և մտավոր հարստության անբաժան մասը:
Բացման արարողության ժամանակ ելույթներ ունեցան նաև Յ.Վայտենբերգը, Ա.Ֆրոլայկը, Հոլանդահայ կազմակերպությունների դաշնության նախագահ Մ.Հախվերդյանը:
Ցուցահանդեսում ներկայացված են Լեյդենի համալսարանում պահվող հայկական ձեռագիր մատյաններ և տպագիր գրքեր, որոնցից է 11-րդ դարի մագաղաթյա գիրք` ժամանակակից թարգմանությամբ:
Ցուցահանդեսը կշարունակվի մինչև հուլիսի 31-ը: