Սոցիալ Դեմոկրատ Հնչակյան կուսակցության «Սարգիս Տխրունի» ուսանողական երիտասարդական միությունը Շուշիի ազատագրման տոնի առթիվ Հայաստանում Լեռնային Ղարաբաղի Հանրապետության առջև անց էր կացնում աջակցության բազմամարդ հավաք: Հավաքի մասնակիցները Հայաստանի, Արցախի և Հնչակյան կուսակցության դրոշներով երթով շարժվեցին դեպի Արցախի ներկայացուցչության շենք:
ՍԴՀԿ պատվիրակությունը հանդիպում ունեցավ Հայաստանում ԼՂՀ ներկայացուցչության ղեկավար Կառլեն Ավետիսյանի հետ և Հնչակյան կուսակցության անունից փոխանցեց Շուշիի ազատագրման առթիվ շնորհավորանքները:
Հանդիպման մասնակիցներն իրենց խոսքում անդրադարձան նաև բանակցային գործընթացին և նշեցին, որ Արցախի անկախությունն այլընտրանք չունի: Իր խոսքում ԼՂՀ ներկայացուցչության ղեկավարն անդրադարձավ նաև պատերազմի վերսկսման մասին ադրբեջանական սպառնալիքներին` նշելով, որ եթե պաշտոնական Բաքուն պատրաստ լիներ պատերազմի, ապա վաղուց այն սկսել էր:
ՍԴՀԿ ներկայացուցիչները և ԼՂՀ ներկայացուցչության ղեկավարը փաստեցին, որ առանց Արցախի անմիջական մասնակցության բանակցային գործընթացին Լեռնային Ղարաբաղի խնդրի լուծումն ուղղակի անհնար է, հայտնում է Սոցիալ Դեմոկրատ Հնչակյան կուսակցության մամլո դիվանը: