Մայիսի 10-ին ՀՀ սփյուռքի նախարարության հովանու ներքո Հայաստանի նկարիչների միությունում բացվեց «Հայաստանի գույներ» խորագրով հայ ժամանակակից արվեստի ցուցահանդես` նվիրված Հայ բարեգործական ընդհանուր միության Մարսելի մասնաճյուղի հիմնադրման 100-ամյակին:
ՀԲԸՄ Մարսելի մասնաճյուղի, «Դելտա կուլտուր» և «Ատր Էստ Օստ» միությունների նախաձեռնությամբ կազմակերպված ցուցահանդեսին ներկայացված էր 7 հայաստանաբնակ հայ նկարիչների 35 գործ:
Ողջունելով ներկաներին և շնորհավորելով ցուցահանդեսի բացման կապակցությամբ` նախարար Հրանուշ Հակոբյանն իր բացման խոսքում անդրադարձել է ՀԲԸՄ երկարամյա գործունեությանը: Նա, մասնավորապես, կարևորել է 1914-1923 թվականներին ՀԲԸՄ մատուցած անգնահատելի ծառայությունը, երբ «բարության ու սիրո հիմքի վրա ստեղծված» կառույցը օգնության ձեռք մեկնեց հազարավոր որբերի, հիվանդների և աղքատների:
Նախարարն իր ուրախությունն է արտահայտել հունիսի 17-ից եվրոպական 8 երկրներով ցուցահանդեսի շրջագայության առթիվ, որի ընթացքում հայ նկարիչների գործերը կցուցադրվեն եվրոպական երկրներում և միաժամանակ ամենուր կներկայացվի ՀԲԸՄ և, մասնավորապես, վերջինիս Մարսելի մասնաճյուղի գործունեությունը, հաղորդում է սփյուռքի նախարարության մամլո ծառայությունը:
