Այս փուլում Իսրայելի և Թուրքիայի միջև դիվանագիտական հարաբերությունների խզում չի լինի: Այդ մասին PanARMENIAN.Net-ի թղթակցի հետ զրույցում ասել է ICES նախագահ, Արևելյան Եվրոպայի և ԱՊՀ երկրների ինստիտուտի տնօրեն Ալեքսանդր Ցինկերը: «Բայց իրավիճակը փոխվել է: Հիմա հարաբերությունները «ռազմավարական գործընկերությունից» անցել են «շատ սառը խաղաղության» փուլ: Չեղյալ են հայտարարվել EI Al ինքնաթիռների չվերթերը Թուրքիա, ինչպես նաև բոլոր զբոսաշրջային խմբերի մեկնումը Թուրքիա: Իսրայելի Պաշտպանության բանակի հրամանատարությունը հրաման է արձակել, որի հիման վրա ժամկետային զինծառայողներին, ինչպես նաև զինվորներին և պահեստային սպաներին արգելված է մեկնել Թուրքիա: Նման արգել է դրվել նաև իսրայելական ոստիկանության ծառայողների վրա, ներառյալ սահմանային պաշտպանությունը (ՄԱԳԱԲ): Իսրայելի ԱԳՆ ղեկավարությունը հետևում է իրավիճակին և հույս ունի, որ Էրդողանի պսիխոզն արդեն անցել է գագաթնակետը»,- նշել է Ցինկերը:

Նա նաև ավելացրել է, որ հունիսի 6-ին Իսրայելի հետախուզության նախարար Դան Մերիդորը չեղյալ է համարել հունիսի 7-ին նախատեսված ուղևորությունը Թուրքիա: Նա պետք է ներկայացներ Իսրայելն Ասիական պետությունների փոխհարաբերությունների համագումարում: Այցը չեղյալ հայտարարելու հիմնական պատճառը Թուրքիայում հակաիսրայելական հիստերիայի շարունակությունն է: