«Ամռան շոգին մարդու օրգանիզմը կորցնում է շատ աղ և ջուր: Դրա համար մարդիկ պետք է օգտագործեն օրը 4-6 բաժակ ջուր, թան, մածուն, նաև հանքային ջրեր` ամռան շոգի վնասակար ազդեցությունները հնարավորինս նվազեցնելու համար»,- Երևանում հունիսի 7-ին մամլո ասուլիսում ասաց ՀՀ գլխավոր վարակաբան Արա Ասոյանը:
Նա նաև խորհուրդ է տալիս փողոցային և անհայտ ծագմամբ սննդամթերքից խուսափել, գնումներ կատարելիս ուշադիր լինել հատկապես շուտ փչացող սննդամթերքի նկատմամբ` հավ, ձուկ, խմորեղեն:
«Ես ինքս ասել եմ, որ արդեն ժամանակն է, որ խիստ վերահսկողություն սահմանվի սննդամթերքի հարցում` ոչ միայն գետնանցումներում վաճառվող, այլև սուպերմարկետներում: Մենք չգիտենք` ինչ պայմաններում և ովքեր են պատրաստել այդ գեղեցիկ խմորեղենները, որ վաճառվում են սուպերմարկետներում», - ասել է հանրապետության գլխավոր վարակաբանը սննդամթերքի կետերում իրականացվող վերահսկման մասին:
