«Հայ ազգային կոնգրեսը (ՀԱԿ) չի խառնվում իր անդամ կուսակցություններից և ոչ մեկի, այդ թվում նաև ՀՀՇ ներքին խնդիրներին, քանի որ այն միայն 18 կուսակցությունների համագործակցության դաշտ է»,- այսօր Երևանում կայացած մամլո ասուլիսի ժամանակ հայտնել է ՀԱԿ համակարգող Լևոն Զուրաբյանը: Նա ձեռնպահ մնաց ՀՀՇ-ում տեղի ունեցող ներքին խնդիրները մեկնաբանելուց, որոնք վերաբերում են ՀՀՇ վարչության անդամ Խաչատուր Քոքոբելյանի` ՀՀՇ-ի վարչությունից դուրս գալու մասին լուրերին: Լևոն Զուրաբյանի խոսքով, ՀՀՇ-ն` ի դեմս Քոքոբելյանի, միշտ ակտիվ մասնակցել է ՀԱԿ աշխատանքներին և քաղխորհրդի նիստերին և միշտ դրական է արտահայտվել ՀԱԿ վարած քաղաքականության մասին: Նա ևս մեկ անգամ շեշտեց, որ ՀԱԿ-ը շարունակում է պայքարել արտահերթ ընտրությունների անցկացման համար և նպատակին հասնելու դեպքում կմասնակցի ընտրություններին իր բոլոր անդամ կուսակցություններով:
