Վրաստանի խորհրդարանը հուլիսի 6-ին առաջին ընթերցմամբ ընդունել է պետական գույքի մասին օրինագիծը, որը հանում է սահմանափակումը մայրուղային գազամուղի վաճառքից: Այդ մասին հաղորդում է Civil Georgia վրացական լրատվական գործակալությունը:
Օրինագծով նախատեսվում է հանել գազատարն այն օբյեկտների ցուցակից, որոնց մասնավորեցումն արգելված է: Այդ խողովակով ռուսական գազը Վրաստանի տարածքով մտնում է Հայաստան:
Օրինագծի նախաձեռնողներն Իրավաբանական հանձնաժողովի նախագահ Պավլե Կուբլաշվիլին և նրա տեղակալ Լաշա Տորդիան են: Նախաձեռնության գլխավոր սկզբունքն այն է, որ մասնավոր հատվածն ավելի լավ կարող է կառավարել այդ օբյեկտները, քան պետությունը:
Ավելի վաղ երկրի վարչապետ Նիկա Գիլաուրին հայտարարել էր, որ կառավարությունը մտադիր չէ վաճառել գազամուղի հսկիչ փաթեթը:
Խորհրդարանական փոքրամասնության պատգամավորները հայտարարել են, որ միայն վարչապետի բանավոր խոստումը, որ պետությունն այդ փաթեթը չի վաճառի, բավարար չէ: Ուստի նրանք առաջարկել են իշխող կուսակցության օրինագծում կետ մտցնել, որը կապահովի 49 տոկոս բաժնետոմսերի վաճառքը:
«ՀայՌուսագազարդ» ՓԲԸ-ն դեռ չի մեկնաբանում այդ հարցը` պատճառաբանելով, որ լիազոր անձը գտնվում է արձակուրդում:
