Չնայած այն հանգամանքին, որ ՀՀ համայնքների աշխատավարձի ու սոցվճարների գծով կուտակված պարտքը դեռևս լիովին մարված չէ, այնուամենայնիվ, զգալի մասն արդեն վճարված է: Այդ մասին հուլիսի 20-ին ՀՀ կառավարության մամլո կենտրոնում հաղորդել է Հայաստանի տարածքային կառավարման փոխնախարար Վաչե Տերտերյանը: «Հարկ է նշել, որ արդեն 2008 թվականից ի վեր պարտքը կրճատվում է և հուլիսի 15-ի դրությամբ այն կազմում է 590,374 մլն դրամ.,-ասել է նա:
Վաչե Տերտերյանը հավաստիացրել է, որ մինչև տարեվերջ կվճարվի շուրջ 250 մլն դրամ, իսկ մնացած մասը` 2011 թվականին, ինչը «թույլ կտա ամբողջությամբ մարել այդ պարտքերը»:
Ըստ մարզպետարանների ներկայացրած պաշտոնական տվյալների, 2008թ. հունվարի 1-ի դրությամբ համայնքների աշխատավարձի և սոցվճարումների գծով կուտակված պարտքերը կազմել են 2,3 մլրդ դրամ: Մինչև 2010 թվականի հունվարի 1-ը պարտքը մարվել է 1,5 մլրդ դրամի չափով: