Ներկայումս հայ-թուրքական հարաբերությունների կարգավորման գործընթացը փակուղու մեջ է, քանի որ ի սկզբանե հայ-թուրքական մերձեցումը սխալ հունով էր ընթանում: Այդ մասին այսօր Երևանում կայացած մամլո ասուլիսում հայտնել է ՀՅ Դաշնակցության (ՀՅԴ) խորհրդարանական խմբակցության ղեկավար Վահան Հովհաննիսյանը:
Հովհաննիսյանի խոսքով, ներկա պահին Հայաստանի ղեկավարությունը սխալ է վարվում` շարունակելով պնդել Թուրքիայի խորհրդարանի կողմից հայ-թուրքական Արձանագրությունների վավերացման հարցում: «Հայկական կողմն այժմ պետք է պարզապես պահանջի Թուրքիայից բացել սահմանը, այլ ոչ թե վավերացնել Արձանագրությունները, քանի որ Թուրքիան արդեն հայտարարել է, որ չի վավերացնելու Արձանագրությունները»,- ասել է նա` ավելացնելով, որ Հայաստանը պետք է հետ կանչի Արձանագրությունների ներքո իր ստորագրությունը: