Կոսովոյի վերաբերյալ Հաագայի դատարանի որոշումը ցույց տվեց, որ ազգերի ինքնորոշման իրավունքն ավելի առաջնահերթ նշանակություն ունի, քան տարածքային ամբողջականությունը: Այդ մասին Ստեփանակերտում հայտնել է «Ազատ հայրենիք» խմբակցության նախագահ Արթուր Թովմասյանը: Նա հիշեցրել է, որ ԼՂՀ և Հայաստանի խորհրդարանները պայմանավորվածության են եկել, որի համաձայն Հայաստանի Ազգային Ժողովը կճանաչի Արցախի Հանրապետության անկախությունը, երբ դրա համար հարմար պահ գա: «Ես կարծում եմ, որ այսօր այդ պահը հասունացել է: Այլ պետությունների կողմից Արցախի անկախության ճանաչումը չի խանգարի բանակցային գործընթացին»,- ասել է Թովմասյանը: Նա ավելացրել է, որ Կոսովոյի վերաբերյալ ՄԱԿ միջազգային դատարանի որոշումը կարող է հիմք հանդիսանալ, որպեսզի Հայաստանը սկսի ԼՂՀ միջազգային ճանաչման գործընթացը: ՀՅ Դաշնակցության ԼՂՀ ԱԺ խորհրդարանական խմբակցությունից պատգամավոր Արմեն Սարգսյանն իր հերթին նշել է, որ Հաագայի դատարանի որոշումը միայն դրական անդրադարձ կունենա ԼՂՀ միջազգային ճանաչման վրա:
Հաագայում ՄԱԿ միջազգային դատարանն օրինական է ճանաչել Սերբիայից Կոսովոյի անկախության հռչակումը: Դատարանի վճռի համաձայն, որի հրապարակումը հինգշաբթի օրն ուղիղ եթերով հեռարձակում էին խոշորագույն տեղեկատվական հեռուստաալիքները, 2008 թվականի փետրվարի 17-ին Կոսովոյի հռչակած անկախությունը «չի խախտում միջազգային իրավունքները»:
