Հայաստանի Ազգային մրցունակության հիմնադրամը Տաթևի վանքային համալիրի վերակառուցման ծրագրի իրագործման շրջանակներում դեպի Տաթևի վանք տանող ամենաերկար ճոպանուղու անվան ընտրության մրցույթ էր կազմակերպել: Հալիձոր և Տաթև գյուղերի (Սյունիքի մարզ) բնակիչներն ակնարկներ են պատրաստել, որոնցում ներկայացրել են իրենց տեսակետն այն առնչությամբ, թե ինչպես ճոպանուղին կփոխի իրենց կյանքը:
Մրցույթի մասնակիցների համար տարիքային սահմանափակում չէր առաջադրվել, և մասնակցեցին ինչպես դպրոցականներ, այնպես էլ ուսուցիչներ: Առաջին տեղը զբաղեցրած մասնակիցը համակարգիչ ստացավ` ճոպանուղու համար առաջարկելով «Արծվի թևեր» անվանումը: Առաջարկվել էին նաև «Հալիվուդ», «Բարձրակետ», «Արծվի թռիչք», «Ծիածան», «Տաթև» անունները:
Ինչպես լրագրողների հետ զրույցում նշեց Հայաստանի ԱՄՀ մամլո քարտուղար Զառա Ամատունին, այս մրցույթն առաջին հերթին նպատակաուղղված է այն բանին, որպեսզի վանքի մերձակա գյուղերի բնակիչներին ներգրավի տարածաշրջանում տուրիզմի զարգացման ծրագրի մեջ:
Հալիձորի գյուղապետ Սամվել Ասրյանը նշեց, որ ճոպանուղու կառուցման արդյունքում գյուղում նոր աշխատատեղեր կհայտնվեն: «Սկսած խորհրդային ժամանակներից մեր գյուղը շատ բնակիչներ են լքել, մեկնել են գումար վաստակելու: Իսկ այժմ աշխատատեղերի խնդիրը կլուծվի: Մենք լավատեսությամբ ենք վերաբերվում այս նախագծին»,- ասաց գյուղապետը: