Հայաստանի ԶՈՒ զինվորների սպանության դեպքերը երկյուղ են առաջացնում: Այս մասին Երևանում տեղի ունեցած մամլո ասուլիսի ժամանակ ասել է «Ժառանգություն» կուսակցության խորհրդարանական խմբակցության ղեկավար Ստեփան Սաֆարյանը:
Սաֆարյանի խոսքերի համաձայն, ՀՀ ՊՆ որպեսզի չվերացնի հայ հասարակության վստահությունը բանակի հանդեպ, պետք է բաց հետաքննություն վարի և պատասխանատվության ենթարկի բոլոր մեղավորներին: « Այդ միջադեպը ցույց տվեց, որ զինված ուժերում նույնպես անհրաժեշտ է կադրային փոփոխություններ կատարել, որպեսզի արմատախիլ արվեն հնուց մնացած անբարո բարքերը», - ընդգծել է նա:
Հուլիսի 28-ին Հայաստանի ԶՈՒ զորամասերից մեկում մարտական հերթապահության կանոնների խախտման պատճառով ծագած միջադեպի արդյունքում զոհվել է 6 զինծառայող` լեյտենանտ Վարդգես Թադևոսյանը (Երևան), ժամկետային զինծառայողներ` Գուրգեն Հովսեփյանը (Էջմիածին), Անդրանիկ Սարգսյանը (Երևան), Ռոբերտ Հովհաննիսյանը (Վանաձոր), Արտեմ Մանասյանը (Չարենցավան), Կարո Այվազյանը (Երևան):
