Ռոք երաժիշտ Սերժ Թանգյանի` օգոստոսի 12-ին կայանալիք համերգի բացմանը ելույթ է ունենալու ԱՄՆ-ից հրավիրված հատուկ հյուր` հանրահայտ Viza ռոք-խումբը: Այս մասին հայտնում են Սերժ Թանգյանի առաջին հայաստանյան մենահամերգի կազմակերպիչներ «Դիիմ Քոմյունիքեյշնզը» և «Ֆյուջիթիվ Ստուդիոսը»:
Viza-ն երաժշտական ոլորտում հանդես է գալիս 2005թ-ից: Խումբը բաղկացած է ինչպես հայ, այնպես էլ այլազգի 9 երիտասարդ տաղանդավոր երաժիշտներից, որոնց թվում է Ջիվան Գասպարյան կրտսերը:
Սերժ Թանգյանը խմբի մասին ասել է. «Viza-ն այն եզակի և հետաքրքիր խմբերից է, որ ես երբևէ հանդիպել եմ: Նրանք հիանալի աշխատանք են կատարում` միացնելով արևելյան և արևմտյան երաժշտությունը, և նրանց համերգներն ուրախ են անցնում և լի են էներգետիկայով»: