Համահնչակյան երիտասարդական ամառային բանակումը, որ կազմակերպել է Սոցիալ-դեմոկրատական հնչակյան կուսակցությունը Հանքավանում, նպատակ է հետապնդում աշխարհի տարբեր երկրներից ժամանած կուսակցության երիտասարդական թևի ներկայացուցիչների ինտերակտիվ շփումը: Այդ մասին Երևանում կայացած ՍԴՀԿ երիտասարդական թևի Սիրիայի, Լիբանանի և Ֆրանսիայի ներկայացուցիչների համատեղ մամլո ասուլիսում հայտարարել է Հայաստանի ներկայացուցիչ Գագիկ Մելիքյանը:
Ինչպես նշել է Մելիքյանը, բանակումը մեկնարկեց օգոստոսի 3-ին և կավարտվի օգոստոսի 8-ին: «Ճամբարին մասնակցում է 200 հոգի: Մասնակիցները կայցելեն Գառնի, Գեղարդ, Սևան: Միջոցառման ավարտին կլինեն նաև Ծիծեռնակաբերդում և կհարգեն Հայոց ցեղասպանության զոհերի հիշատակը»,-ասել է նա:
Իր հերթին Ֆրանսիայից ժամանած Հնչակյան կուսակցության ներկայացուցիչ Սարո Մարդինյանը հայտարարեց, որ ճամբարի բոլոր մասնակիցները լի են լավ տպավորություններով և մտադիր են արդեն ամեն տարի այցելել հայրենիք: «Եթե «հայրենադարձության» համապատասխան ծրագիր լինի և այստեղ մեզ գոնե աշխատանքով ապահովեն, ապա մենք ընդմիշտ կմնանք հայրենիքում»,-ասել է նա:
