«Հանուն քաղաքացիական իրավունքների» Կոմիտեի նախագահ Անդրեյ Բաբուշկինը Անկախ մամլո կենտրոնում կայացած մամլո ասուլիսում հաղորդել է, որ Բաքվից փախուստի դիմած հայերին փորձում են աքսորել Մոսկվայից:
Ինչպես հաղորդում է Երկրամաս թերթը, Անդրեյ Բաբուշկինը հիշեցրել է, որ Բաքվի մի քանի հազար բնակիչներ` հիմնականում հայեր և ռուսներ, ստիպված են եղել լքել իրենց մշտական բնակավայրերը, երբ Ադրբեջանում հայերի ջարդերի ալիք բարձրացավ: Նրանցից շատերը ապաստան գտան Մոսկվայում, որտեղ նրանց ժամանակավոր օթևան տրամադրեցին: Իսկ երբ պարզ դարձավ, որ նրանք չեն կարողանա Ադրբեջան վերադառնալ, նրանք գրանցվեցին այդ օթևաներում: Բայց նրանց, ում ապաստան էին տրամադրել մոսկովյան «Յուժնայա» հյուրանոցում, բախտն ավելի քիչ բերեց: 1995 թվականին այն սեփականացվեց, մայրաքաղաքի իշխանությունները հայտարարեցին, որ մասնավոր հյուրանոցներում բնակվող մարդկանց առջև պարտավորություններ չունեն: 90-ական թվականների վերջին, Անդրեյ Բաբուշկինի խոսքով, ծրագրվում էր միջգերատեսչական հանձնաժողով ստեղծել, որը կսահմաներ Ռուսաստանում փախստականների իրավական կարգավիճակը, իսկ մոսկովյան միգրացիոն ծառայությունը կազմեց օթևանի կարիք ունեցող փախստականների ցուցակը և կազմեց բնակարան ստանալու հերթը: Սակայն 2000 թվականի սկզբին, իրավապաշտպանի խոսքով, մայրաքաղաքի իշխանությունները լիկվիդացրեցին միջգերատեսչական հանձնաժողովը, որը պետք է սահմաներ փախստականների իրավական կարգավիճակը:
Այժմ «Յուժնայա» հյուրանոցի ղեկավարությունը, Բաբուշկինի խոսքով, փախստականներին տեղահանում է Իվանովի մարզի Ֆուրմանով քաղաք: Ընդ որում, Բաքվի հայերի համար բնակարանը ձեռք է բերվել ոչ թե սեփականատերերից, այլ «լիազորագրով» այն վաճառող մարդկանցից, ուստի չի բացառվում, որ որոշ ժամանակ անց կհայտնվեն իսկական սեփականատերերը, և գործարքը չեղյալ կհամարվի: Ավելին, փախստականները, բնակարանի սեփականատեր դառնալու համար պետք է 100 հազ. Ռուբլու չափով մաքս վճարեն, սակայն թոշակառուներն ու հաշմանդամներն ի վիճակի չեն լինի վճարել այդ գումարը:
Սոցիալական Տեղեկատվության Գործակալության տեղեկատվության համաձայն, Մոսկվայի Գագարինի դատարանը օժանդակել է հյուրանոցի ղեկավարության նման որոշումը: Իրավապաշտպանները գտնում են, որ Բաքվի հայերին փորձում են երկրորդ անգամ աքսորել: Անդրեյ Բաբուշկինը նշել է, որ Մոսկվայում փախստականներն ընկերներ ու բարեկամներ ունեն, որոնք ապահովված են աշխատանքով: «Մենք մոսկովյան իշխանություններին ու դատական մարմիններին կոչ ենք անում գտնել խնդրի լուծումը, որը թույլ կտա այդ մարդկանց գոյատևել»,- հայտնել է իրավապաշտպանը: Նրա տվյալներով, իրավական կարգավիճակից ու օթևանից ներկա պահին զուրկ են 16 փախստականներ, որոնք բնակվում են «Յուժնայա» հյուրանոցում, ինչպես նաև Վվեդենսկու փողոցում գտնվող հանրակացարանում և այլուր բնակվող փախստականներ, որոնց ընդհանուր թիվը կազմում է ոչ պակաս, քան 350 հոգի:
