Աղթամար կղզու Սուրբ Խաչ եկեղեցում պատարագի անցկացումը Հայոց ցեղասպանությունն արդարացնելու Անկարայի հերթական փորձն է: Այդ մասին PanARMENIAN.Net-ի թղթակցին հայտնել է Ամերիկայի Հայ դատի հանձնախմբի (ANCA) գործադիր տնօրեն Արամ Համբարյանը: Նրա խոսքերով, եթե Թուրքիան իրականում ցանկանար եկեղեցի բացել հավատացյալների համար, ապա ոստիկանությունը եկեղեցուց չէր վռնդի հայաստանցի երեխաներին` արգելելով աղոթել: «Ժամերգության անցկացումը ևս մեկ PR քայլ է, որը ցույց կտա Անկարայի իրական մտադրությունները. պատրաստ են արդյոք երկրի ղեկավարությունը և հասարակությունը համաձայնության գալ և ճանաչել Հայոց ցեղասպանությունը`բարոյական և նյութական փոխհատուցումներով»,- ասել է Համբարյանը:
Անցյալ շաբաթ թուրքական ոստիկանությունը Սբ. Խաչ եկեղեցուց վռնդել էր հայ երեխաներին, որոնք ուխտագնացություն էին կատարում Արևմտյան Հայաստանում: Ոստիկանը թույլ չի տվել մոմ վառել` պատճառաբանելով, թե իբր նրանք «կվնասեն որմնանկարները»:
