Հայաստանի նախագահ Սերժ Սարգսյանը, Հայաստանի Հանրապետության անկախության հռչակման 19-րդ տարեդարձի առթիվ, ստորագրել է մի շարք հրամանագրեր:
Մասնավորապես` Հանրապետության ղեկավարի հրամանագրով մարդկային բազում կյանքերի սպառնացող վտանգի առկայությամբ արտակարգ իրադրության պայմաններում ցուցաբերած բարձր մասնագիտական պատրաստվածության համար «Արմավիա» ավիաընկերության օդանավի հրամանատար Սամվել Հարությունի Ապիկյանը պարգեւատրվել է «Հայրենիքին մատուցած ծառայությունների համար» 2-րդ աստիճանի մեդալով, իսկ «Արմավիա» ավիաընկերության օդանավի երկրորդ օդաչու Արազ Ալիկի Արազյանը` Անանիա Շիրակացու մեդալով:
Երկարամյա եւ արդյունավետ աշխատանքի համար Անանիա Շիրակացու, Մխիթար Հերացու և Մովսես Խորենացու մեդալներով պարգեւատրվել են երկրի տարածքային կառավարման ոլորտի մի շարք աշխատակիցներ: ՀՀ մեդալներով են պարգևատրվել նաև գիտության և կրթության ոլորտի մի շարք ներկայացուցիչներ, հայտնում է նախագահի մամլո ծառայությունը:
