«ԵԱՀԿ ՄԽ դաշտային առաքելությունը, որը կանցնի հոկտեմբերի 4-14 Լեռնային Ղարաբաղում, լավ հնարավորություն է տալիս, որպեսզի հայկական կողմը արծարծի Ադրբեջանի կողմից օկուպացված հայկական տարածքներում նման առաքելություն անցկացնելու անհրաժեշտությունը»,-Երևանում կայացած մամլո ասուլիսում հայտարարել է ՀՀԿ խորհրդարանական խմբակցության անդամ Արտակ Զաքարյանը:
Ըստ նրա, այդ առաքելությունը լրացուցիչ խթան կհանդիսանա ղարաբաղյան հակամարտության կարգավորման համար: Անդրադառնալով բանակցային գործընթացին՝ պատգամավորը նշել է, որ հայկական կողմին հաջողվեց առաջ տանել ԼՂՀ ինքնորոշման իրավունքը: Արտակ Զաքարյանը նշեց նաև, որ ԼՂՀ անկախության ճանաչումը Հայաստանի կողմից կարող է փոխել բանակցությունների տրամաբանությունը: «Հայկական կողմը կգնա նման քայլի, եթե կարգավորման մյուս բոլոր տարբերակները սպառվեն»,-հայտարարել է պատգամավորը:
