Ռուսաստանի Անվտանգության խորհրդի նախաձեռնությամբ Սոչիում կայանալիք անվտանգության հարցերը համակարգող պաշտոնյաների միջազգային հանդիպմանը մասնակցելու նպատակով հոկտեմբերի 4-ին Սոչի կմեկնի Ազգային անվտանգության խորհրդի քարտուղար Արթուր Բաղդասարյանի գլխավորած պավիրակությունը:
Շուրջ վեց տասնյակ երկրների պատվիրակությունները երկու օր կքննարկեն անվտանգության համաշխարհային մարտահրավերներին միասին դիմակայելու հնարավորությունները, մասնավորապես` քննարկման առարկա կդառնան տեղեկատվական անվտանգությանն սպառնացող մարտահրավերները, բնական և տեխնածին աղետների, ահաբեկչության, թմրամիջոցների ապօրինի շրջանառության, անօրինական միգրացիայի, զենքի և ռադիոակտիվ նյութերի անօրինական շրջանառության դեմ պայքարի հարցերը:
Այցի ընթացքում Արթուր Բաղդասարյանը երկկողմ հանդիպումներ կունենա Ռուսաստանի, Հնդկաստանի, Չինաստանի, Միացյալ Արաբական Էմիրությունների, Բուլղարիայի, Ավստրիայի պատվիրակությունների ղեկավարների հետ:
Պատվիրակությունը կվերադառնա Երևան հոկտեմբերի 6-ին, հաղորդում է Ազգային անվտանգության խորհրդի քարտուղարի մամուլի գրասենյակը: