Սերբ ռեժիսոր Էմիր Կուստուրիցան ի նշան բողոքի լքել է Անթալիայում «Ոսկե նարինջ» 47-րդ միջազգային կինոփառատոնի ժյուրին, հաղորդում է World Bulletin-ը:
Ռեժիսորի դեմարշի պատճառը մի քանի հասարակական կազմակերպությունների հայտարարություններն էին: Կազմակերպիչները դատապարտել են Կուստուրիցային այն պատճառով, որ նա «պաշտպանել էր Բոսնիայում մահմեդականների ցեղասպանությունը սերբերի կողմից»: Մեկնաբանելով մեղադրանքը` Կուստուրիցան հայտարարել է, որ ստեղծված իրավիճակն արվեստի համար տեղ չի թողնում և հրաժարվել է ժյուրիի անդամ լինելուց:
«Բոլորը հիանալի գիտեն, որ ես հակաիմպերիալիստ եմ և հենց այդ գաղափարի վրա եմ կառուցել ողջ կյանքս և գործունեությունս: Նման մեղադրանքներն իմ հասցեին ոչ մի իմաստ չունեն: Ես պայքարել եմ հանուն միասնական Հարավսլավիայի, և իմ մոտեցումները պետք է դիտարկվեն հենց այդ տեսակետից»,- հայտարարել է ռեժիսորը:
