Երևանում տեղի է ունեցել էներգետիկայի և շրջակա միջավայրի մասին միջազգային կրթական SPARE (School Project for Application for Resourses and Energy) ծրագրին նվիրված խորհրդաժողով: Ինչպես PanARMENIAN.Net-ին է հայտնել Հայաստանում նախագծի ղեկավար, «Տապան» էկո-ակումբի ղեկավար Հրանտ Սարգսյանը, Հայաստանում ծրագրի գոյության 10 տարում դրան մասնակցել են 150 ուսուցիչներ և 1460 աշակերտներ երկրի 11 մարզերի 140 դպրոցներից: «Էներգիայի և ռեսուրսների օգտագործումն» առարկան ընթացիկ տարում դարձել է «դպրոցական ծրագրի բաղադրիչ», այսինքն դպրոցներն իրենք են ընտրել, թե «դպրոցական բաղադրիչների» թվից որ առարկան է դասավանդվելու»,-ասել է նա:

Իր հերթին, խորհրդաժողովին ներկա SPARE ծրագրի ղեկավար Կայ Ասբյոռն Կնուտսեն Շյոռլիենն ասաց, որ տպավորված է ծրագրի հաջողությամբ Հայաստանում և դպրոցականների շահագրգռվածությամբ, որոնք բազմաթիվ գաղափարներ են ներկայացրել էներգախնայողության ուղղությամբ:

Ծրագիրը նախաձեռնել է Նորվեգիայի բնության պահպանության ընկերությունը (Երկրի բարեկամները, Նորվեգիա) 1996թ.: Ծրագիրը գործում է Եվրոպայի, Կովկասի ու Միջին Ասիայի 17 երկրներում: Ազգային համակարգողները հանդիպում են տարին մեկ անգամ: