ԵԱՀԿ ՄԽ դաշտային առաքելությունը փորձ էր ակտիվացնել կամ շարունակել ղարաբաղյան կարգավորման բանակցային գործընթացը: Այդ մասին Երևանում կայացած մամլո ասուլիսում հայտարարել է քաղաքագետ Սերգեյ Մինասյանը:
Ըստ նրա, այսօր հակամարտության կողմերը պատրաստ չեն զիջումների, իսկ միջազգային հանրությունը չի շտապում ճնշում գործադրել նրանց հանդեպ: Քաղաքագետը գտնում է, որ ղարաբաղյան կարգավորման գործընթացում վերջերս լուրջ ինտրիգներ են եղել, մասնավորապես, երկարացվել է Հայաստանում ռուսական ռազմակայանի տեղակայման ժամկետը, ինչը վկայում է այն մասին, որ Մոսկվան շահագրգիռ է պահպանել ստատուս-կվոն, ինչպես նաև Բարաք Օբամայի ու Իլհամ Ալիևի հանդիպումն ԱՄՆ-ում: Սերգեյ Մինասյանը փաստում է, որ մինչ ԵԱՀԿ գագաթնաժողովը Աստանայում լուրջ առաջընթաց չի լինի, սակայն միջնորդները մի քանի կրեատիվ առաջարկություններ կանեն հակամարտության կողմերին, շարունակելու համար խաղաղ բանակցությունները:
Անդրադառնալով զեկույցին, որը պատրաստվելու է ԵԱՀԿ ՄԽ դաշտային առաքելության արդյունքների հիման վրա, Մինասյանն ասել է, որ այդ զեկույցը, ինչպես նաև 2005թ. նմանատիպ փաստաթուղթը, հազիվ թե անդրադառնան բանակցային գործընթացի վրա:
